Puyol: Ef við mætum ekki tilbúnir gæti þetta farið illa

Varnarmaðurinn Carles Puyol hjá Meistaradeildarmeisturum Barcelona varar við vanmati þegar liðið mætir Stuttgart í fyrri leik liðanna í 16-liða úrslitum Meistaradeildar Evrópu annað kvöld.

Þegar dregið var í 16-liða úrslitin var Stuttgart í mikilli lægð og átti slæman kafla þar sem það vann ekki tíu leiki í röð en nú virðist liðið vera að rétt úr kútnum. Stuttgart hefur unnið sex af síðustu sjö deildarleikjum sínum og vann 5-1 stórsigur gegn Köln um helgina.

„Ef við mætum ekki tilbúnir í þennan leik þá gæti þetta farið illa. Stuttgart er að spila vel þessa dagana og er mjög hættulegt lið," segir Puyol en Barcelona hefur ekki enn náð sömu hæðum í spilamennsku sinni í Meistaradeildinni og á síðasta tímabili en er þó vitanlega mun sigurstranglegra fyrir viðureign liðanna.