Eiður ekki með af því hann er á milli félaga - ekki útaf leikforminu

Eiður Smári Guðjohnsen fær frí frá stórleikjunum við Norðmenn og Dani af því hann er ekki búinn að finna sér félag til að spila með í vetur. Þetta segir landsliðsþjálfarinn Ólafur Jóhannesson.

Eiður er sem kunnugt er ekki í leikmannahópnum sem tilkynntur var í dag.

"Málið er að hann er á milli liða og er hvergi að spila. Það er ástæðan fyrir því að ég valdi hann ekki," sagði Ólafur.

Ástæðan er ekki sú að hann er ekki í leikformi?

"Við ræddum saman og niðurstaðan er þessi. Það er í sjálfu sér ekkert meira um það að segja," sagði landsliðsþjálfarinn sem vildi ekkert segja um viðbrögð Eiðs.

En af hverju var hann þá valinn í leikinn gegn Liechtenstein fyrir tveimur vikum?

"Þá valdi ég mitt besta lið og var að skoða leikmenn og annað. Það hefur ekkert með þennan leik að gera."

Væru þessir leikir í undankeppninni semsagt að trufla hann í því að finna sér félag?

"Eins og ég sagði áðan, leikurinn gegn Liechtenstein kemur valinu á þessu liði ekkert við. Eiður er frá í þessum mánuði," sagði Ólafur að lokum.

Eiður er ekki hættur með landsliðinu að sögn Ólafs sem vonast til að geta valið hann síðar.