Lán til Baugs Group jók áhættuna í bankakerfinu

Lán bankanna til Baugs Group jók kerfislæga áhættu bankakerfisins, að mati Rannsóknarnefndar Alþingis. Félagið fékk lán hjá öllum stóru bönkunum þremur auk Straums Burðaráss. Sama máli gegndi um lán til Existu, Björgólfs Thors Björgólfssonar, Björgólfs Guðmundssonar, og Ólafss Ólafssonar.

Í skýrslu rannsóknarnefndarinnar segir að rekstur bankanna hafi einkennst af því að hámarka hag stærstu hluthafa þeirra, sem í krafti eignarhlutar síns hafi haft góðan aðgang að lánsfé.

Þar er jafnframt bent á að stærstu eigendur bankanna hafi verið fyrirferðamiklir og aukið áhættu bankanna. Þá virðist sem Baugur og FL Group hafi beitt ráðandi stöðu sinni í Glitni til að hafa áhrif á lánveitingar og gripið inn í eðlilegar tilraunir bankans til að gæta hagsmuna sinna gagnvart félögum sem bankinn hafði lánað. Þá er bent á að lánveitingar til nýrra eigenda og stjórnenda Glitnis verulega eftir stjórnar- og forstjóraskipti vorið 2007.

Aðrir stærstu hluthafar bankanna eru nefndir sem hafi myndað stóra áhættu í bankakerfinu. Þar á meðal eru útgerðamaðurinn Magnús Kristinsson, Saxhóll, Byggingarfélag Gylfa og Gunnars, BNT, Sund, Gift, Straumborg og Jakob Valgeirs.

Rannsóknarnefndin segir það ámælisvert að áhættustýringar bankanna hafi leyft þessari áhættu að byggjast upp og vísað til þess að Basel-nefnd Alþjóðagreiðslubankans varar sérstaklega við því að bankar kunni að meta greiðslugetu lántakanda á annan hátt ef hann er lykilhluthafi eða stjórnarmaður.