Róbert: Betra að tapa svona í leik en einhverjum mikilvægum

„Það er alltaf hundleiðinlegt að tapa en þetta var skemmtilegur handbolti og bara æfingaleikur. Auðvitað viljum við alltaf vinna en það er betra að tapa í svona leik en einhverjum mikilvægum,“ sagði Róbert Gunnarsson sem var öflugur á línunni í kvöld og skoraði sex mörk í tapi Íslands gegn Dönum, 28-29 í Laugardalshöllinni. „Dönsku varnarmennirnir voru eitthvað fúlir út í mig. Þó þetta hafi verið æfingaleikur þá var vel tekið á mér og þeir létu mig óspart finna fyrir því.“ Róbert er ánægður með að fá þessa æfingarleiki við Dani og telur að reynslan úr þeim muni nýtast vel í undirbúningi fyrir HM á næsta ári. „Það er fínt að fá svona leiki til að fara yfir leikkerfin og fínpússa vörnina. Það fer alltaf mikið púður í fá upp góða vörn og þessir leikir voru góð æfing. Það er líka alltaf gaman að fá að koma heim, spila fyrir framan íslenska áhorfendur og ljúka tímabilinu með þeim hætti.“