Ísland mætir Króatíu í kvöld

Íslenska landsliðið í knattspyrnu má ekki misstíga sig gegn neðsta liði undanriðilsins fyrir HM á næsta ári, Króatíu. Liðin mætast klukkan 20 á Laugardalsvelli í kvöld.

Ísland þarf að vinna til að mæta Frökkum í úrslitaleik í ágúst um efsta sæti riðilsins.

Margrét Lára Viðarsdóttir er ekki í byrjunarliðinu en hún hafði skorað í öllum landsleikjum á Laugardalsvelli undir stjórn Sigurðar Ragnar Eyjólfssonar frá því hann tók við liðinu árið 2007, þar til á laugardaginn.

Margrét átti ekki góðan leik en hún hefur átt við meiðsli að stríða og líklegra að hún sé ekki í liðinu vegna þeirra en markaleysisins.

Ísland hefur spilað átta landsleiki undir stjórn Sigurðar á Laugardalsvelli frá 2007, unnið þá alla og markatalan er 40-0.