FH úr leik eftir andlausa frammmistöðu

FH er úr leik í forkeppni Meistaradeildar Evrópu eftir tap, 0-1, fyrir BATE Borisov frá Hvíta-Rússlandi í einum leiðinlegasta fótboltaleik sem spilaður hefur verið á Íslandi. BATE vann rimmu liðanna 6-1 samtals.

Það var Vitali Radzionau sem skoraði eina mark leiksins með laglegu skoti utan teigs á 15. mínútu. Fátt markvert gerðist þess utan í þessum hrútleiðinlega knattspyrnuleik.

Eftir markið hættu liðin hreinlega að spila alvöru fótbolta. Hægur og leiðinlegur göngubolti tók við í staðinn.

Leikurinn var í raun lítið annað en sóun á tíma og súrefni.

FH átti ekki skot að marki í fyrri hálfleik. Ekki einu sinni 50 metra tilraun sem fór 30 metra fram hjá. Þeir gerðu nákvæmlega ekki neitt.

Þeir voru skíthræddir, huglausir og höfðu enga trú á því sem þeir voru að gera. Markmiðið að komast sómasamlega frá verkefninu. Það var enginn sómi af þessari frammistöðu. Hún var skammarlega léleg.

Síðari hálfleikur var vissulega skömminni skárri hjá FH en góður var hann ekki. Það er langur vegur frá því.

Það var FH til happs að BATE-menn tóku því rólega eftir markið og sigldu þægilega og áreynslulaust í næstu umferð. Þeir hefðu hæglega getað valtað yfir Fimleikafélagið en sáu aumur á Íslendingunum. Þó svo þeir hafi verið í öðrum gír nánast allan leikinn tókst FH ekki að skora.

FH-BATE Borisov 0-1

0-1 Vitali Radzionau (15.)

Áhorfendur: Afar fáir.

Dómari: Hannes Kasik, Eistlandi.

Skot (á mark): 5-14 (1-5)

Varin skot: Gunnleifur 4 - Veremko 1

Horn: 2-3

Aukaspyrnur fengnar: 9-24

Rangstöður: 2-3

FH (4-3-3)

Gunnleifur Gunnleifsson

Jón Ragnar Jónsson

Hafþór Þrastarson

Tommy Nielsen

(78., Freyr Bjarnason)

Hjörtur Logi Valgarðsson

(43., Bjarki Gunnlaugsson)

Pétur Viðarsson

Björn Daníel Sverrisson

Matthías Vilhjálmsson

Ólafur Páll Snorrason

Atli Viðar Björnsson

(64., Atli Guðnason)

Torger Motland