Fabregas: Ég vildi spila leikinn í kvöld

Cesc Fabregas, fyrirliði Arsenal, vildi spila í gegnum sársaukann þegar Arsenal mætir Porto í Meistaradeildinni í kvöld en ákvað síðan að hlusta á lækna liðsins.

Fabregas verður ekki með þegar Arsenal reynir að vinna upp 2-1 forskot Porto frá því í fyrri leiknum og það gæti orðið erfitt fyrir lærisveina Arsene Wenger að vinna þetta sterka portúgalska lið án leiðtoga síns og lykilmanns.

„Ég vildi spila þennan leik en læknarnir ráðlögðu mér að hvíla og ná mér góðum," sagði Cesc Fabregas í viðtali við The Sun.

„Ég er mjög leiður yfir að missa af Porto-leiknum því hann er mjög mikilvægur fyrir okkur alla. Það verður mjög erfitt að fylgjast með þessum leik af hliðarlínunni," sagði Fabregas.

Fabregas er ekki mikið meiddur og það eru einhverjar líkur á því að hann geti spilað á móti Hull í ensku úrvalsdeildinni um næstu helgi.