Valdes: United með betra sóknarlið en Barca

Victor Valdes, markvörður Barcelona, reyndi að setja pressu á lið Manchester United að sækja í úrslitaleik Meistaradeildarinnar á Wembley í kvöld. Valdes talaði um í viðtali fyrir leikinn að United sé með betra sóknarlið en Barcelona.

Valdes hélt hreinu þegar Barcelona vann 2-0 sigur á Manchester United í úrslitaleik Meistaradeildarinnar fyrir tveimur árum.

„Bæði lið hafa bætt sig mikið síðan þá. Við höfum þroskast sem lið frá því fyrir tveimur árum," sagði Victor Valdes í viðtali við The Daily Mirror.

„Manchester hefur meiri sóknarþunga en við og kannski mun United-liðið sækja meira en það gerði í Róm fyrir tveimur árum," sagði Valdes.

„Það býr mikið í þessu Manchester-liði, við höfum séð það í mörgum leikjum þar á meðal í leiknum í Róm. Ég er viss um að taugar beggja liða verða strekktar í þessum leik og þetta verður örugglega spennandi úrslitaleikur," sagði Valdes.

„Ég er viss um að margir hafi dreymt um að fá þessi lið í úrslitaleikinn og nú er bara að sjá hvað gerist í leiknum," sagði Valdes.