Vettel nýtur þess að keppa í Montreal

Sebastian Vettel hjá Red Bull hefur unnið fimm Formúlu 1 mót af sex á keppnistímabilinu og keppir í Montreal í Kanada um næstu helgi, ásamt liðsfélaga sínum Mark Webber. Vettel vann síðustu keppni, sem fór fram í Mónakó og Webber varð fjórði.

Vettel er með 143 stig í stigakeppni ökmumanna, en Lewis Hamilton hjá McLaren 85 og forskot Vettel er því nokkuð gott eftir fyrstu sex mótin. Fyrir sigur í mótum fást 25 stig og 18 fyrir annað sætið og 15 fyrir það þriðja, en færri stig fyrir næstu sæti á eftir, en 10 fyrstu ökumennirnir fá stig í hverju móti.

Vettel segir brautina í Kanada óvenjulega, en mótssvæðið í Montreal er á svæði sem er notað í almennri umferð dags daglega, en um götubraut er að ræða eins og í Mónakó. Vettel finnst brautin minna á Albert Park í Melbourne, en það er líka götubraut.

„Það er mjög hált þarna, en malbikið er með slétt yfirborð og í fyrra var mikið dekkjaslit. Það er alltaf gaman að fara þangað", sagði Vettel um mótssvæði í Montreal í fréttatilkynningu frá Red Bull.

„Stemmningin er frábær og áhorfendurnir eru sérstakir. Þetta er í eina skiptið sem við förum vestur yfir haf til að keppa og borgin og fólkið er svalur staður. Það er gaman að dvelja þarna mótsvikuna og keppa og ég hlakka því til."

      

Webber er hrifinn að því hve afslappaðir áhorfendur í Kanada eru og segir stemmninguna því góða.

„Brautin hefur skapað áhugaverð mót, af því þetta er götubraut og yfirbygging bílanna er með lítið niðurtog, sem býður upp á framúrakstur. Það er alltaf skemmtileg tilfinning að finna fyrir því í Montreal að það er mót í gangi, þegar við erum ekki á sjálfri brautinni", sagði Webber.

Webber telur að brautin í Montreal ætti að reyna á liðin á nýjan hátt í ár, en yfirbygging bílanna er öðruvísi en í fyrra. FIA hefur gefið það út að ökumenn mega nota stillanlegan afturvæng bílanna á tveimur svæðum í Montreal. Til þess hefur aðeins verið gefið leyfi fyrir notkun á stillanlegum aftuvængjunum á einu svæði í mótum ársins.

„Ég var annar á ráslínu í fyrra, en Red Bull hefur aldrei náð toppárangri á sunnudag á brautinni", sagði Webber.

Hamilton vann mótið í Montreal í fyrra á McLaren, Jenson Button á samskonar bíl varð annar, en Vettel þriðji og Webber fjórði.