Villa vill klára ferilinn hjá Barcelona

David Villa, leikmaður Barcelona, vill spila með liðinu þar til að ferli hans lýkur. Villa er 29 ára gamall og kom til félagsins síðastliðið sumar.

Villa skoraði 23 mörk með Barcelona á síðustu leiktíð er félagið varð bæði Spánar- og Evrópumeistari. Engu að síður hefur hann verið orðaður við önnur félög í sumar en það hefur ekki haft áhrif á hann.

„Mér stendur á sama um allar sögusagnir og orðróma - þetta eru allt lygar,“ sagði Villa. „Ég myndi gjarnan vilja fá tækifæri til að spila með Barcelona þar til að knattspyrnuferlinum lýkur.“

Cesc Fabregas, fyrirliði Arsenal, og Sílemaðurinn Alexis Sanchez hjá Udinese hafa báðir verið orðaðir við Barcelona í sumar. „Þetta eru tveir mjög góðir leikmenn, bæði sem einstaklingar og í liðsheild. Ef þeir koma yrði það mikil og góð viðbót við okkar lið,“ sagði Villa.