Sögunni endalausu um Fabregas virðist vera að ljúka

Sagan endalausa um vistaskipti Cesc Fabregas, leikmanns Arsenal, til Börsunga virðist vera á enda runninn. Samningaferlið ku vera komið á lokastig og leikmaðurinn gengur líklega til liðs við Barcelona á næstu vikum.

Miðjumaðurinn Xavi sem leikur með spænsku meisturunum sagði í viðtali við RAC1 að Fabregas myndi ganga til liðs við Barcelona áður en ágúst mánuður rennur út.

„Við hlökkum til að fá Cesc til liðsins og það er útlit fyrir að það muni gerast á allra næstu vikum. Það eina sem stendur í vegi fyrir því að leikmaðurinn gangi til liðs við okkur er samningsatriði milli félaganna, ég er jákvæður og tel að Cesc sé á leiðinni til okkar".