Gunnar vettvangsstjóri UEFA hjá Rúrik og félögum

Gunnar Gylfason, starfsmaður KSÍ, verður vettvangsstjóri UEFA (UEFA Venue Director) á leik danska liðsins OB og Villareal frá Spáni en íslenski landsliðsmaðurinn Rúrik Gíslason leikur einmitt með danska liðinu.

Leikurinn fer fram á leikvangi OB í Óðinsvéum á miðvikudag og er liður í umspili um sæti í riðlakeppni Meistaradeildar UEFA. Þetta kom fram á heimasíðu KSÍ.

Hlutverk vettvangsstjóra UEFA er að hafa yfirumsjón með framkvæmd leikja í Evrópudeild og Meistaradeild, í nánu samstarfi við fulltrúa heimaliðs í viðkomandi leik.  

Vettvangsstjórinn fylgist með því að allt sé upp sett og fari fram samkvæmt reglum og samþykktum í aðdraganda leiksins og meðan á leik stendur.