Ólafur hættir með landsliðið í haust

Ólafur Jóhannesson, landsliðsþjálfari karla í fótbolta, mun ekki halda áfram með íslenska landsliðið eftir að undankeppni EM lýkur í haust. Geir Þorsteinsson, formaður KSÍ, tilkynnti þetta á blaðamannafundi nú áðan.

Ólafur á því aðeins eftir að stýra íslenska landsliðinu í þremur leikjum þar af verða tveir þeirra í næstu viku, útileikur gegn Noregi og heimaleikur gegn Kýpur. Síðasti leikurinn undir hans stjórn verður síðan útileikur í Portúgal í október.

Það hefur lengi stefnt í það að Ólafur fái ekki nýjan samning en nú hefur formaður sambandsins í fyrsta sinn staðfest það að Ólafur verði ekki áfram þjálfari landsliðsins.