McLaren gefst ekki upp í titilslagnum

Martin Whitmarsh hjá McLaren segir liðið ekki hafa gefist upp í titilslagnum í Formúlu 1, en Sebastian Vettel á Red Bull er með afgerandi forskot í stigamóti ökumanna eftir sigur á Monza brautinni á Ítalíu á sunnudaginn. Jenson Button varð annar á McLaren á Monza brautinni, Fernando Alonso á Ferrari þriðji og Lewis Hamilton á McLaren fjórði.

 

Red Bull er með 451 stig í stigamóti bílasmiða eftir keppnina á Monza, McLaren er með 325 og Ferrari 254. Red Bull er því í sterkri stöðu í stigamóti bílasmiða eins og í stigamóti ökumanna.

 

Vettel er með 284 stig í stigamóti ökumanna, Alonso 172, Button 167 og Mark Webber hjá Red Bull er einnig með 167 stig. Hamilton er með 158.

 

Vettel er með 112 stiga forskot í stigakeppni ökumanna og getur tryggt sér titilinn í næsta móti í Singapúr, ef úrslitin verða honum í hag. Whitmarsh telur möguleika á sigri McLaren í Singapúr mótinu.

 

„Það eru góðir möguleika á að vinna. Við erum hérna til þessa að sigra og munum reyna af kappi í Singapúr, svo mikið er víst", sagði Whitmarsh í frétt á autosport.com. Aðspurður um hvort slagnum um meistaratitillinn væri lokið sagði Whitmarsh:

„Nei. Ekki ennþá. En við viljum reyna að vinna nokkur mót. Það er mögulegt, en þeir (Red Bull liðið) eru að gera góða hluti og Sebastian er ekki að gera nógu mikið af mistökum að mínu mati, en sjáum hvað setur."

Um frammistöðu McLaren á Monza sagði Whitmarsh:



„Við vorum með hraðann í bílnum, en ræsingin gekk ekki vel sem var svekkjandi. Ef keppnin hefði verið einum hring lengri, þá hefðum við náð báðum bílum í verðlaunasæti. Við náðum fleiri stigum en nokkuð annað lið og náðum besta og næstbesta tíma í (í einstökum hring) í keppninni. Við vorum vonsviknir að vinna ekki. En það eru sex mót eftir, sem við getum unnið og við munum keppa að því af kappi", sagði Whitmarsh.