Mourinho hefur áhyggjur af útivallarforminu

Jose Mourinho, þjálfari Real Madrid, viðurkenndi í gær að hann hefði miklar áhyggjur af spilamennsku liðsins á útivelli. Real hefur þegar tapað fimm stigum á útivelli í vetur.

Real gerði markalaust jafntefli við Racing Santander í gær, aðeins þrem dögum eftir að hafa tapað gegn Levante á útivelli.

"Auðvitað er það mikið áhyggjuefni að hafa þegar tapað fimm stigum á útivelli. Við spiluðum ekki vel í fyrri hálfleik. Við réðum lögum og löfum í þeim seinni en sköpuðum okkur því miður ekki nóg af færum," sagði Mourinho.

"Racing varðist vel og okkur vantaði kraftinn til þess að klára leikinn. Racing fékk samt að komast upp með að tefja ótrúlega mikið."