Valencia upp fyrir Real Betis og Barcelona og alla leið í toppsætið

Valencia fylgdi á eftir jafntefli við Chelsea í Meistaradeildinni í vikunni með því að vinna 1-0 sigur á Granada í spænsku úrvalsdeildinni í fótbolta í dag. Sigurinn kom Valencia-mönnum upp fyrir Real Betis og Barcelona og í toppsæti deildarinnar.

Sergio Canales, sem er í láni hjá Valenica frá Real Madrid, skoraði eina mark leiksins strax á 6. mínútu leiksins með skoti af 25 metra færi. Valencia er með 13 stig einu stigi meira en Real Betis og tveimur meira en Barcelona.

Real Betis fær Levante í heimsókn á morgun en Barcelona sækir Sporting Gijon heim. Real Madrid er með 10 stig og mætir Espanyol í Barcelona á morgun.