Messi er ekkert að hugsa um markametið hjá Barcelona

Argentínumaðurinn Lionel Messi rauf 200 marka múrinn hjá Barcelona í gær og er nú aðeins 34 mörkum frá markameti félagsins. Þrátt fyrir það segist Messi ekkert vera að hugsa um metið.

"Ég er ánægður með leikinn, úrslitin og að hafa komist í 200 mörk fyrir Barcelona. Úrslitin skipta þó öllu máli," sagði Messi en hann verður seint sakaður um að tala í fyrirsögnum.

"Það er ekkert sérstakt markmið hjá mér að slá þetta markamet. Ég mun bara halda áfram að spila minn leik og hjálpa liðinu að vinna og skora mörk."