Vergne fljótastur þriðja daginn í röð og ánægður með frammistöðu sína

Jean Eric Vergne frá Frakklandi reyndist fljótastur í dag á æfingu Formúlu 1 liða á Yas Marina brautinni í Abú Dabí. Hann náði líka besta tíma á mánudag og þriðjudag, en æfingadagurinn í dag var sá síðasti á dagskrá. Æfingarnar notuðu liðin m.a. til að gefa ungum ökumönnum tækifæri um borð bílum sínum. Vergne var með besta tíma í dag á undan Bretanum Sam Bird á Mercedes, en Frakkinn Jules Bianchi náði þriðja besta tíma á Ferrari.

 

Meiri hiti var í dag en á mánudag og þriðjudag í Abú Dabí, en lofthiti fór upp í 33 gráður og brautarhiti í 55 gráður. Vergne, sem er 21 árs gamall hafði áður ekið með Torro Rosso í tvígang á föstudagsæfingu fyrir kappakstursmót. Hann á möguleika á sæti sem varaökumaður eða keppnisökumaður með Torro Rosso liðinu á næsta ári, samkvæmt frétt autosport.com. Formúlu 1 lið Torro Rosso og Red Bull liðin eru bæði í eigu Red Bull fyrirtækisins.

 

„Þetta sýnir að ég bý yfir þeim hraða sem þarf til að keppa í Formúlu 1. En það er Red Bull að ákveða og þökk sé þeim þá gat ég prófað þennan bíl. Ég hef gert mitt besta og núna verða þeir að ákveða hvað er mér fyrir bestu hvað framtíðina varðar," sagði Vergne í frétt auosport.com.

 

„Ég hef gert allt sem ég gat á þessum þremur dögum og nú á ég eina æfingu eftir, keyri í Brasilíu. Við sjáum hvað setur. Ég er mjög ánægður. Þetta voru meiriháttar dagar og ég er mjög ánægður með það sem ég hef gert fyrir liðið. Allt gekk vel," sagði Vergne.

 

Bird sem náði næstbesta tíma í dag ók 104 hringi í dag með Mercedes. Liðið einbeitti sér að þróunarvinnu fyrir næsta ár á æfingunni.

 

„Ég er þakklátur Mercedes fyrir að treysta mér fyrir þeirri ábyrgð að keyra á þessa þrjá æfingadaga. Þetta hefur verið jákvæð og ánægjuleg reynsla fyrir mig og ég naut þess að vinna með liðinu", sagði Bird.



Tímarnir af autosport.com

1. Jean-Eric Vergne Red Bull-Renault 1m38.917s

2. Sam Bird Mercedes GP 1m40.897s

3. Jules Bianchi Ferrari 1m41.347s

4. Olivier Turvey McLaren-Mercedes 1m41.513s

5. Max Chilton Force India-Mercedes 1m41.575s

6. Esteban Gutierrez Sauber-Ferrari 1m42.049s

7. Mirko Bortolotti Williams-Cosworth 1m43.277s

8. Kevin Ceccon Toro Rosso-Ferrari 1m43.686s

9. Alexander Rossi Lotus-Renault 1m44.283s

10. Jan Charouz Renault 1m44.470s

11. Stefano Coletti Toro Rosso-Ferrari 1m44.545s

12. Nathanael Berthon HRT-Cosworth 1m45.839s

13. Robert Wickens Virgin-Cosworth 1m45.934s

14. Charles Pic Virgin-Cosworth 1m46.348s