Götze verður ekki seldur í janúar

Jürgen Klopp, þjálfari Dortmund, hefur ítrekað í aðdraganda leiksins gegn Arsenal að ungstirnið Mario Götze sé ekki til sölu.

Forráðamenn Arsenal ætla sér að nýta tækifærið og ræða við kollega sína hjá Dortmund um leikmanninn en Arsenal er eitt nokkurra liða sem hefur mikinn áhuga á að kaupa strákinn.

Þessi 19 ára strákur er einnig orðaður við FC Bayern og Real Madrid meðal annars.

"Það mun ekkert gerast í hans málum í janúar. Það truflar okkur ekkert að einhver lið séu að sýna honum áhuga," sagði Klopp.

"Ekkert lið kaupir leikmann af okkur bara sísvona. Ekki einu sinni Arsenal. Leikmaðurinn er ekkert að velta sér upp úr þessu sem betur fer. Hann er helslakur yfir öllum þessum málum."

Götze er samningsbundinn Dortmund til 2014.