FIA staðfesti að 20 Formúlu 1 mót verða á dagskrá 2012

7. desember 2011 16:02

Fyrsta Formúlu 1 mótið á næsta ári verður í Melbourne í Ástralíu. Sebastian Vettel vann mótið í Melbourne á Red Bull á þessu keppnistímabili og kemur hér fyrstur í endamark í mótinu. MYND: Getty Images/ Robert Cianflone

FIA, alþjóðabílasambandið staðfesti í dag að 20 Formúlu 1 mót verða á

dagskrá á næsta ári og verður væntanlega nýtt mótssvæði tekið í notkun í

Austin í Texas í Bandaríkjunum.

Í frétt á autosport.com í dag er greint frá því að bygging brautarinnar i Bandaríkjunum fari í gang á ný, en hún hafði verið stöðvuð, eftir að samningar um mósthaldið lentu í hnút. Það mál virðist nú leyst samkvæmt fréttinni og mótið í Bandaríkjunum var staðfest á mótaskrá FIA í dag.

Mót sem átti að vera í Barein í upphafi þessa keppnistímabils var fellt út vegna ástandsins sem var í landinu, en mót í Barein er á dagskrá FIA á ný á næsta ári.

Fyrsta mót ársins verður í Ástralíu 18. mars og viku síðar verður keppt í

Malasíu. Fyrstu fjóra mánuði keppnistímabilsins fara tvö mót fram í mánuði, en þrjú mót verða í júlí. Ekki verður keppt í ágúst, en þrjú mót verða á mánuði í september, október og nóvember.

Nýja mótssvæðið i Texas í Bandaríkjunum verður samkvæmt dagskrá FIA notað í keppni þann 18. nóvember, en lokamót ársins á að fara fram 25. nóvember í Brasilíu.

Mótaskráin 2012

18. mars, Ástralía

25. mars, Malasía

15. apríl, Kína

22. apríl, Barein

13. maí, Spánn

27. maí, Mónakó

10. júní, Kanada

24. júní, Evrópa

8. júlí, Bretland

22. júlí, Þýskaland

29. júlí, Ungverjaland

2. september, Belgía

9. september, Ítalía

23. september, Singapúr

7. október, Japan

14. október, Suður Kórea

28. október, Indland

4. nóvember, Abú Dabí

18. nóvember, Bandaríkin

25. nóvember, Brasilía

Formúla