Robinho: Hræðilegt ef við töpum fyrir Tottenham

Brasilíumaðurinn Robinho segir að það verði mikið áfall fyrir AC Milan ef liðið tapar fyrir Tottenham í 16-liða úrslitum Meistaradeildar Evrópu.

Liðin eigast við á San Siro í kvöld í fyrri viðureign liðanna í keppninni.

Milan er á toppi ítölsku úrvalsdeildarinnar og ætla sér að komast langt í Meistaradeildinni.

„Það má vel vera að Tottenham sé ekki eins og Manchester United og Chelsea."

„En þetta er mjög hættulegt lið og við þurfum að standa okkur vel í fyrri leiknum til að forðast það að þurfa að fara til Lundúna undir mikilli pressu."

„Það væri hræðilegt að detta úr leik núna. Við erum þó ekki stressaðir fyrir þessa leiki. Liðið sem mun spila betur í vörn kemst áfram."