Neymar: Ronaldinho mælti með Barcelona

Brasilíumaðurinn Neymar hefur gefið vísbendingu um að hann muni á endanum ganga til liðs við Barcelona á Spáni. Þessi tvítugi kappi er nú á mála hjá Santos í heimalandinu en hann þykir einn efnilegasti knattspyrnumaður heims.

Ronaldinho var sjálfur í fimm ár hjá Barcelona og naut mikillar velgengni. Hann er nú kominn aftur til Brasilíu en Neymar lítur mjög upp til hans.

„Velgengni hans hefur alltaf verið ákveðið viðmið fyrir mig," sagði Neymar við fjölmiðla á Spáni. „Ég hef alltaf tekið ráðleggingar Ronaldinho til greina og hann talaði mjög vel bæði um félagið og borgina. Hann sagði Barcelona frábæra."

„Það vita svo allir að liðið er frábært og stútfullt af stjörnum. Það er aldrei að vita hvað gerist."

Neymar hefur þegar spilað fimmtán landsleiki með Brasilíu og skorað í þeim átta mörk.