Sauber-liðið í skýjunum með annað sætið

Liðsmenn Sauber liðsins í Formúlu 1 sér enga ástæðu til að vera vonsviknir eftir að hafa misst af fyrsta sætinu í malasíska kappakstrinum um síðastliðna helgi.

Sergio Perez, 22 ára Mexíkói sem er nú að hefja annað ár sitt í Formúlu 1, varð annar á eftir Fernando Alonso í kappakstrinum og átti raunhæfa möguleika á sigri áður en hann gerði mistök og fór út af brautinni.

Annað sætið er samt besti árangur Sauber liðsins síðan það fyrst tók þátt árið 1993. BMW keypti reyndar liðið árið 2006 og vann einn sigur. Hann kom í Kanada árið 2008 með Robert Kubica undir stýri. Árið 2011 keypti Peter Sauber, stofnandi liðsins, liðið aftur og rekur það enn í dag.

"Ég er ánægð með það sem við uppskárum," sagði Monisha Kaltenborn framkvæmdastjóri Sauber liðsins. "Þetta er stór áfangi fyrir liðið sem gefur góð merki um að við séum á leið upp listan, hægt en örugglega."

Perez segist enn vera á jörðinni: "Markmiðið er að bæta bílinn sem heild. Á endanum vil ég alltaf vinna mótin og ég trúi því að fyrsti sigur minn komi fyrr en seinna." Orðrómur þess efnis að Perez muni taka við sæti Felipe Massa hjá Ferrari í lok ársins hefur farið hátt undanfarið enda hefur Massa staðið sig mjög illa.

Annað sæti Sergio Perez í kappakstrinum um helgina er einnig besti árangur Mexíkóa í 41 ár. Síðasti Mexíkóinn í öðru sæti var Pedro Rodriguez í hollenska kappakstrinum á Zandvoort árið 1971. Tuttugu dögum síðar lést hann í kappakstri í Þýskalandi.