Tiger fagnaði sigri eftir 924 daga bið | snilldartaktar á Bay Hill

Tiger Woods sigraði á Bay Hill meistaramótinu á PGA mótaröðinni í golfi sem lauk í kvöld. Þetta er tímamótasigur hjá bandaríska kylfingnum sem hafði ekki fagnað sigri á atvinnumóti frá árinu 2009.

Bay Hill virðist vera einn af uppáhaldskeppnisvöllum hjá Woods. Því þetta er í sjöunda sinn sem hann sigrar á þessu móti. Woods var fimm höggum betri en Norður-Írinn Graeme McDowell sem endaði í öðru sæti.

Woods lék lokahringinn á -2 eða 70 höggum og var hann samtals á -13. Þetta er mesti munur á PGA móti frá því að Rory McIlroy sigraði með átta högga mun á opna bandaríska meistaramótinu á síðasta ári.

"Þetta er góð tilfinning, mjög góð tilfinning,“ sagði Woods í sjónvarpsviðtali við NBC eftir keppnina. "Aðstæður voru erfiðar og holustaðsetningar voru hrikalegar. Arnie náði að gera okkur grikk,“ bætti Woods við og vitnaði þar í Arnold Palmer sem er gestgjafinn á þessu móti.

"Hafið gætur á ykkur strákar sem eruð á PGA mótaröðinni. Tiger er mættur til leiks á ný,“ sagði Johnny Miller golfsérfræðingur á NBC sjónvarpsstöðinni eftir keppnina. Woods hefur sigrað á 72 mótum á PGA mótaröðinni.

Fyrir lokahringinn hafði Woods eins höggs forskot á McDowell.