Alonso vann í Malasíu á undan Perez

Fernando Alonso á Ferrari vann kappaksturinn í regnríkinu Malasíu. Mótið var ræst í hellidembu og var stöðvað níu hringjum síðar vegna vatnsflaumsins á brautinni.

Sergio Perez á Sauber-Ferrari bíl var annar í kappakstrinum. Hann átti möguleika á sigri en eyðilagði það fyrir sjálfum sér þegar hann gerði akstursmistök þegar fjórir hringir voru eftir. Þetta er besti árangur Perez í Formúlu 1 og er hann ótvíræður maður mótsins.

Úrslitin voru ansi óvænt því Ferrari bíllinn hefur ekki verið neitt sérstaklega öflugur. Alonso ræsti áttundi í mótinu og sagði eftir tímatökurnar að hann hefði kreist allt sem hann gat úr bílnum.

Lewis Hamilton var þriðji en furðu sætti að McLaren bílarnir skortu hraða eftir endurræsinguna í hring tíu. Jenson Button, einnig hjá McLaren, lauk mótinu í 14. sæti. Hann sigraði í Ástralíu fyrir viku síðan en lenti í samstuði við Narain Karthikeyan snemma í mótinu og braut framvænginn.

Regndekkin hrjáðu McLaren liðið nokkuð því þeir náðu ekki nægum hita í þau. Mercedes liðið átti í andstæðum vandamálum og ofhituðu dekkin. Michael Schumacher klárði mótið í 10. sæti og Nico Rosberg í 13. sæti.

Red Bull átti erfiða keppni. Heimsmeistarinn Sebastian Vettel var í fjórða sæti þegar hann varð kærulaus og sprengdi afturdekk. Hann komst þó inn á viðgerðarsvæðið en liðið skipaði honum að draga sig í hlé í síðasta hring, á endanum fór Vettel yfir línuna í 11. sæti. Mark Webber lauk mótinu í fjórða sæti.

Kimi Raikkönen var fimmti fyrir Lotus liðið og átti hraðasta hring. Liðsfélagi hans, Roman Grosjean, endaði annað mótið sitt í röð í malargryfjunni. Í þetta skiptið var það þó akstursmistökum hans að kenna.

Bruno Senna lauk mótinu sjötti fyrir Williams liðið og Paul di Resta þar á eftir fyrir Force India. Jean Eric Vergne kom sér í áttunda sætið eftir að hafa ollið vonbrigðum í tímatökum með 18. sæti.

Efstu menn í heimsmeistarakeppninni:

Ökumenn:

1. Fernando Alonso 31 stig

2. Lewis Hamilton 30

3. Jenson Button 25

4. Mark Webber 24

5. Sergio Perez 22

6. Sebastian Vettel 18

7. Kimi Raikkönen 16

8. Bruno Senna 8

Lið:

1. McLaren 55

2. Red Bull 42

3. Ferrari 35

4. Sauber 30

5. Lotus 16

6. Force India 9

7. Williams 8

8. Toro Rosso 6

9. Mercedes 1