Íslensku strákarnir fengu stig gegn Dönum

Íslenska landsliðið í knattspyrnu skipað drengjum 17 ára og yngri gerði 2-2 jafntefli gegn Dönum í fyrsta leik sínum í milliriðli Evrópumótsins í kvöld. Íslensku strákarnir jöfnuðu leikinn í tvígang en leikið var á Cappielow Park í Greenock í Skotlandi.

Eftir markalausan fyrri hálfleik var boðið upp á mörk í þeim síðari. Marcus Mathiasen kom Dönum yfir á 42. mínútu en Daði Bergsson, leikmaður Þróttar, jafnaði fimm mínútum síðar.

Marcus Mathiasen var aftur á ferðinni á 55. mínútu og kom Dönum yfir og stefndi allt í danskan sigur. Gunnar Guðmundsson, þjálfari Íslands, gerði þrjár breytingar á liðinu tíu mínútum fyrir leikslok. Ein þeirra var innkoma Gunnlaugs Birgissonar, leikmanns Breiðabliks, sem skoraði jöfnunarmarkið mikilvæga fimm mínútum fyrir leikslok.

Í hinum leik riðilsins lögðu Skotar, sem leika á heimavelli, landslið Litháa 1-0. Heimamenn leiða því riðilinn með 3 stig, Danir og Íslendingar hafa 1 stig en Litháar án stiga.

Næsti leikur Íslands er gegn Skotum á fimmtudag. Síðasti leikurinn er gegn Litháum á sunnudag.

Leikmenn Íslands í kvöld

Fannar Hafsteinsson (markvörður)

Adam Örn Arnarson

(72. Ingiberg Ólafur Jónsson)

Ósvald Traustason

Orri Sigurður Ómarsson

Hjörtur Hermannsson (fyrirliði)

Emil Ásmundsson

Oliver Sigurjónsson

(72. Gunnlaugur Birgisson)

Stefán Þór Pálsson

Kristján Flóki Finnbogason

Páll Þorsteinsson

(71. Ævar Jóhannesson)