Kobayashi mun hafa áhrif á toppbaráttuna

Jenson Button, ökuþór McLaren liðsins í Formúlu 1, segir að Kamui Kobayashi á Sauber muni hafa áhrif á framvindu kappakstursins í Kína á morgun. Kobayashi mun ræsa þriðji í kappakstrinum.

Hraði Kobayashi á æfingum hefur valdið toppliðunum áhyggjum um að hann gæti orðið stór þáttur í toppbaráttunni í kappakstrinum á morgun. Hraði Kobayashi yfir langar vegalengdir er nægilega góður svo hann geti haldið stöðu sinni í brautinni og gott betur en það.

Jenson Button ræsir fimmti þrátt fyrir að hafa náð aðeins sjötta besta tíma um brautina í Shanghai í morgun. Liðsfélagi hans hjá McLaren, Lewis Hamilton, fékk fimm sæta refsingu í vikunni vegna þess að liðið þurfti að skipta um gírkassa í bíl hans. Hamilton náði öðrum besta tíma í tímatökunum en ræsir sjöundi.

"Það er ekki auðvelt að ræsa þaðan sem ég er," sagði Button í Kína í dag. "Við erum þó fljótari en allir þeir sem eru fyrir framan okkur. Kobayashi er samt sem áður undantekning. Sauber bíllinn er fljótur yfir langar vegalengdir og það verður flókið að skáka hann."

Button gerir ráð fyrir að Mercedes bílarnir tveir muni fljótlega falla aftur í toppbaráttunni í keppninni á morgun. Mercedes bílar Rosberg og Schumacher ræsa fremstir en hafa farið illa með dekkin í fyrstu tveimur mótum ársins. Liðið hefur aðeins náð einu stigi í heimsmeistarakeppninni.

"Þetta er algerlega breytt uppröðun á ráslínunni frá því sem við höfum séð hingað til í ár," sagði Button ennfremur. "Þetta verða því spennandi fyrstu hringir á morgun."