Tim Wiese orðaður við Real Madrid

Þýski markvörðurinn Tim Wiese hefur staðfest að Real Madrid hafi sett sig í samband við umboðsmann sinn.

Wiese er nú á mála hjá Werder Bremen en fer frá liðinu í sumar. Hefur hann verið orðaður við nokkur lið en það gæti verið erfitt fyrir hann að hunsa áhuga Real Madrid.

„Það hafa samskipti átt sér stað á milli Real Madrid og umboðsmannsins míns en það er svo margt sem á eftir að koma í ljós og þarf að taka til greina - til að mynda þarfir fjölskyldunnar," sagði Wiese við þýska fjölmiðla.

Iker Casillas hefur staðið vaktina í markinu eins og síðustu ár en Jose Mourinho, stjóri liðsins, vill fá fleiri sterka markverði til liðsins. Jerzy Dudek fór frá liðinu síðasta sumar og Antonio Adan, sem fáir þekkja, hefur setið á bekknum hjá liðinu í vetur.

Wiese og Casillas eru báðir 30 ára gamlir og er óvíst hvort að sá fyrrnefndi myndi sætta sig við að sitja á bekknum stærstan hluta tímabilsins.