Selfyssingar fóru létt í gegnum KB

Pepsi-deildarlið Selfoss vann öruggan 4-0 sigur á 3. deildarliði KB úr Breiðholti í 16-liða úrslitum Borgunarbikars karla í knattspyrnu á Selfossi í kvöld.

Jón Daði Böðvarsson kom heimamönnum yfir á 24. mínútu og Ólafur Karl Finsen bætti við öðru marki eftir hálftímaleik. Þannig stóðu leikar þar til stundarfjórðungi fyrir leikslok að Abdoulayye Ndiaye skoraði þriðja markið. Norðmaðurinn Jon Andre Royrane skoraði fjórða mark heimamanna skömmu síðar og öruggur sigur Selfyssinga í höfn.

Selfyssingar eru komnir í átta liða úrslit bikarsins en KB, eina félagið úr 3. deild sem enn var með í keppninni, er úr leik.

Upplýsingar um markaskorara frá Úrslit.net.