19 ára liðið tryggði sér sigur á móti í Svíþjóð

Íslenska landsliðið í knattspyrnu skipað drengjum 19 ára og yngri gerði í dag 1-1 jafntefli gegn Norðmönnum á fjögurra þjóða móti í Svíþjóð.

Á Fésbókarsíðu KSÍ kemur fram að Norðmenn hafi haft undirtökin í leiknum og komist yfir í fyrri hálfleik. Blikinn Atli Fannar Jónsson jafnaði hins vegar metin fyrir Ísland í síðari hálfleik en með jafnteflinu tryggði íslenska liðið sér sigur á mótinu.

Á fimmtudaginn lögðu Íslendingar Svía 2-0 og á þriðjudaginn lágu Rúmenar 4-1.

Elís Már Ómarsson, leikmaður Keflavíkur, var markahæsti leikmaður Íslands á mótinu með tvö mörk. Kristinn Rúnar Jónsson þjálfar liðið.