Abidal stefnir á endurkomu í desember

Franski knattspyrnumaðurinn Eric Abidal hjá Barcelona stefnir á endurkomu á knattspyrnuvöllinn í síðasta lagi í desember.

Abidal þurfti að fara í lifrarígræðslu í apríl en er að eigin sögn á góðum batavegi.

„Mér líður mun betur en fyrir þremur mánuðum og fylgi fyrirmælum læknanna," sagði vinstri bakvörðurinn 33 ára í viðtali að loknum æfingaleik PSG og Barcelona á laugardag.

„Ég er byrjaður að taka aðeins á því í líkamsræktinni og líður vel. Ég held því áfram og sjáum til hvort ég verði ekki mættur á völlinn hjá Barca í desember," sagði Abidal og lagði áherslu á að það væri markmið hans.

Abidal greindist með krabbamein í lifur í fyrra og þurfti að fjarlægja æxlið. Hann náði þá bata á ótrúlega skömmum tíma. Hann veiktist þó að nýju í vetur og og ljóst að hann þyrfti að gangast undir lifrarígræðslu.