NBA: Clippers vann sinn 17. sigur í röð í nótt

Fjórir leikir fóru fram í NBA-deildinni í körfuknattleik í nótt en fátt virðist geta stöðvað Los Angeles Clippers sem vann sinn 17. leik í röð.

Clippers lagði Utah Jazz af velli 107-96 í Staples Center í Los Angeles. Þessi magnaði árangur hjá Clippers er félagsmet en liðið hefur unnið alla leiki sína í desembermánuði eða 16 leiki.

Caron Butler gerði 29 stig fyrir LA Clippers í nótt og Jamal Crawford skoraði 19 stig. Sacramento Kings vann frábæran sigur á Boston Celtics 118-96 en John Salmons var atkvæðamestur í liði Kings með 23 stig og Jason Thompson skoraði 20 stig fyrir félagið.

DeMarcus Cousins átti frábæran leik fyrir Sacramento en hann tók 10 fráköst, gaf 10 stoðsendingar og skoraði 12 stig.

Öll úrslit gærkvöldsins:

Los Angeles Clippers - Utah Jazz 107-96

Dallas Mavericks - San Antonio Spurs 86-111

Detroit Pistons - Milwaukee Bucks 96-94

Sacramento Kings – Boston Celtics 118-96