Messi brýtur niður markamúra

Lionel Messi er engum líkur. Hann skoraði tvö mörk gegn Rayo Vallecano um helgina. Það voru mörk númer 300 og 301 hjá þessum ótrúlega leikmanni. Hann er búinn að skora þessi rúmlega 300 mörk í aðeins 419 leikjum.

270 mörk komu í leik með Barcelona og 31 með argentínska landsliðinu. 246 mörk voru skoruð með hinum fræga vinstri fæti hans. 41 mark er skorað með hægri fæti. 12 sinnum skallaði Messi í netið, hann hefur skorað eitt mark með búknum og svo eitt ólöglegt mark með hendinni.

Þessi litli snillingur, sem er aðeins 169 sentimetrar á hæð, er nú búinn að skora 73 mörk á þessu ári. Brasilíumaðurinn Pelé skoraði mest 75 mörk á einu ári en það gerði hann árið 1959. Þjóðverjinn Gerd Müller á þó markametið fyrir eitt ár en það er 85 mörk og sett árið 1972.

„Að slá þetta met hans Pelé er það síðasta sem ég hef áhyggjur af. Við unnum erfiðan útileik og það er það eina sem skiptir máli," sagði hinn hógværi Messi sem er ávallt auðmýktin uppmáluð og stígur ekki feilspor utan vallar frekar en innan hans.

Mörkin eru orðin 44 í spænsku deildinni á þessu ári en Cristiano Ronaldo átti metið. Það voru 43 mörk og sett á síðasta ári.

Messi fær gullskóinn í dag þar sem hann var markahæsti leikmaður Evrópu á síðustu leiktíð.

„Ég vil þakka liðsfélögum mínum. Án þeirra gæti ég aldrei hafa náð þessum árangri," bætti hinn lítilláti Messi við.

Síðasta tímabil var lyginni líkast hjá Argentínumanninum en hann hefur ekki slegið slöku við í vetur. Hann er þegar búinn að skora 17 mörk í 14 leikjum í vetur. Hann er þess utan búinn að leggja upp sex mörk en Cristiano Ronaldo á enn eftir að leggja upp mark á þessari leiktíð.