Hafdís í góðum gír á Stórmóti ÍR

Hafdís Sigurðardóttir úr UFA náði flottum árangri á fyrri degi Stórmóts ÍR í frjálsum íþróttum í dag en mótið er hluti af Reykjavíkurleikunum. ÍR-ingurinn Hilmar Arnar Jónsson setti piltamet í kúluvarpi og náði lágmarki fyrir HM unglinga í sumar. Þetta kemur fram á heimasíðu ÍR-inga.

Hafdís Sigurðardóttir hljóp 200 metra hlaupið á 24,78 sekúndum og stökk 6,04 metra í langstökki. Hafdís vann 200 metra hlaup kvenna en Hrafnhild Eir Hermóðsdóttir úr ÍR varð í 2. sæti á 25.42 sekúndum.

Hilmar Arnar Jónsson úr ÍR setti eina Íslandsmet dagsins þegar hann kastaði kúlunni 18,17 metra í kúluvarpi pilta 16-17 ára en þetta er piltamet og jafnframt lágmark á HM unglinga í sumar.

Í 200 metra karla var mjög hart barist en Ívar Kristinn Jasonarson ÍR hafði þar betur gegn Kristni H. Gunnarssyni úr UFA. Ívar hljóp á 21,86 sekúndum en Kristinn kom í mark á 21,96 sekúndum.

Heiðar Geirmundsson úr ÍR sigraði í kúluvarpi karla með 15,93 metra en Ásgeir Bjarnason úr FH varð annar með 15,29 metra kast. Kristinn Torfason úr FH sigraði í langstökki karla með 6,95 metra stökki.

Mikið var af bætingum í 800 metra hlaupi karla þar sem Kristinn Þór Kristinsson úr UMF Samhyggð vann með nokkrum yfirburðum þegar hann hljóp á 1:52,63 mínútum.

Arnar Pétursson úr ÍR bætti sig verulega og var bara rétt yfir tveggja mínútna múrnum þegar hann hljóð á 2:00,15 mínútum.

Að lokum bera að geta tíma Hlyns Andréssonar úr ÍR en hann sigraði með yfirburðum í 3000 metra hlaupi karla þegar hann hljóp á 8:52,12 mínútum.