Ólafur og félagar unnu toppliðið

Ólafur Guðmundsson skoraði fjögur mörk þegar að lið hans, Kristianstad, vann góðan útisigur á toppliði Lugi, 25-23, í sænsku úrvalsdeildinni í handbolta í kvöld.

Kristianstad hafði þriggja marka forystu í hálfleik, 12-9, en liðið er nú með 37 stig í fjórða sæti deildarinnar.

Mikil spenna er á toppi deildarinnar en aðeins þrjú stig skilja að efstu fimm liðin. Lugi er efst með 40 stig og Sävehof í öðru sæti með 38 stig. Guif, Kristianstad og Drott koma svo næst með 37 stig.