Mourinho hrósar Pandev fyrir hreinskilnina

Jose Mourinho, þjálfari Real Madrid, er afar ánægður með stuðninginn sem hann hefur fengið frá Goran Pandev, leikmanni Napoli, í slag sínum við FIFA. Mourinho er á því að brögð hafi verið í tafli við val á þjálfara ársins.

Pandev, sem er fyrirliði makedónska landsliðsins, hefur gefið það út að hann hafi kosið Mourinho. Í skjölum FIFA kemur aftur á móti fram að Pandev hafi kosið Vicente del Bosque, landsliðsþjálfara Spánverja, en hann vann kjörið.

"Pandev hringdi í mig og sagði mér frá þessu. Aðrir sem standa með mér kjósa að vera nafnlausir og ég verð að bera virðingu fyrir því," sagði Mourinho en hann neitaði að mæta á kjörið.

FIFA hefur birt kjörseðil Pandev þar sem sést að hann hafi kostið Del Bosque. Pandev segir að það sé ekki hans skrift á kjörseðlinum.