McLaren verður með Honda-vélar 2015

McLaren-liðið í Formúlu 1 mun knýja bíla sína með Honda-vélum frá árinu 2015. McLaren hefur verið með Mercedes-vélar síðan 1995 og átti þýski bílaframleiðandinn hlut í liðinu þar til nýverið.

Honda rak keppnislið í Formúlu 1 til ársins 2008 þegar efnahagskreppan neyddi þá til að selja liðið sitt og hætta öllum afskiptum af Formúlu 1. Ross Brawn tók þá yfir liðið og vann það heimsmeistaratitilinn á ævintýralegan hátt árið 2009 undir merkjum Brawn.

Vísir greindi frá því í mars að þetta samstarf gæti verið mögulegt eftir að Mercedes-samningurinn væri úti.

McLaren og Honda hafa þó áður starfað saman. Á níunda áratug síðustu aldar voru bílar liðsins knúnir Honda-vélum og ekki minni menn en Alain Prost og Ayrton Senna sem óku bílunum. Samstarfið skilaði McLaren og Honda til að mynda sigrum í öllum nema einu móti keppnistímabilið 1988.

Martin Whitmarsh, liðsstjóri McLaren, sagði þegar endurnýjað samstarf var kynnt að árið 2015 kæmu saman tveir aðilar sem hafa saman "skapað bestu og eftirminnilegustu atvik í Formúlu 1 allra tíma".

McLaren mun nota Mercedes-vélar á næsta ári þegar forþjöppur verða leyfðar á ný í kappakstrinum. Honda hefur því hátt í tvö ár til að undirbúa vélarnar.

Whitmarsh segir að samningurinn um Honda-vélarnar sé ekki skilyrtur við að japanarnir sinni einungis McLaren-liðinu. Fleiri lið gætu því útvegað sér Honda-vélar fyrir keppnistímabilið 2015.

Er það jafnframt bundið í regluverkið um Formúlu 1 að vélaframleiðendur sem þegar skaffa liðum vélar verða að vera tilbúnir að gera samkomulag við fleiri lið, séu vélaframleiðandi ekki að skaffa of mörgum liðum.

Jonathan Neale, ramkvæmdastjóri McLaren, segir að liðið væri meðvitað um að önnur lið gætu verið áhugasöm um Honda-vélarnar. "Það er auðvitað betra að Honda svari því en allir vélaframleiðendur taka þátt með það í huga að fleiri lið gætu haft áhuga. Við erum ekki að gera okkur vonir um neitt. Það verður nóg að gera þar til 2015."

Myndbrotið hér að ofan er úr Top Gear þegar Lewis Hamilton fékk tækifæri til að aka MP4/4-bílnum sem Ayrton Senna ók árið 1988.