Barcelona orðið Spánarmeistari

Barcelona varð í kvöld Spánarmeistari í knattspyrnu. Liðið þurfti þó ekki að spila til þess að landa titlinum. Real Madrid gerði í kvöld jafntefli, 1-1, gegn Espanyol og Real á því ekki lengur möguleika á því að ná Barcelona.

Espanyol var sprækara liðið í fyrri hálfleik og þeir uppskáru um miðjan hálfleikinn er Stuani skoraði. Espanyol hefði getað bætt við mörkum fyrir hlé en allt kom fyrir ekki.

Madridingar komu til baka í síðari hálfleik og Higuain jafnaði metin snemma í hálfleiknum. Madrid sótti talsvert en náði ekki að skora.

Victor Sanchez var rekinn af velli í lok leiksins fyrir hrikalega tæklingu á Higuain.

1-1 lokatölur og leikmenn Barcelona gátu fagnað heima hjá sér.