Vaknaði með bikarinn í rúminu

Hans Óttar Lindberg áttaði sig á því í morgun að sigur Hamburg í Meistaradeild Evrópu í handbolta hefði ekki aðeins verið góður draumur.

Hornamaðurinn danski, sem á íslenska foreldra, skoraði sigurmark Hamburg í framlengingu gegn Barcelona í úrslitaleiknum í gær. Sigur Hamburg var afar óvæntur líkt og sigur þeirra á ríkjandi Evrópumeisturum Kiel í undanúrslitum á laugardag.

Lindberg skoraði sex mörk fyrir Hamburg og birti meðfylgjandi mynd á Twitter-síðu sinni í morgun.

„Ég vaknaði og áttaði mig á því að þetta hefði ekki bara verið draumur."

Þá vísaði Lindberg í danskt stemmningslag, „Stik mig en øl ellers slår jeg flikflak...", sem er væntanlega vísun í fagnaðarlæti leikmanna Hamburg í Köln gærkvöldi og í nótt. Hægt er að hlusta á lagið í spilaranum að ofan.