Táningurinn á fimm högg á hetjuna sína

Michael Kim brosti út að eyrum þegar hann leit á stöðuna að lokinni 15. holu á þriðja hring á Opna bandaríska meistaramótinu í golfi.

„Ég fylgdist vel með stöðuskiltinu. Ekki vegna þess að ég vildi vita hvernig mér gengi heldur fannst mér svo svalt að sjá nafnið mitt við hlið nafna á borð við Mickelson, Donald og Schwartzel. Það var stórkostleg tilfinning," sagði Kim eftir hringinn.

Kim, sem er nítján ára og stundar háskólanám við Berkeley háskóla í Kaliforníu, var tveimur höggum á eftir  forystusauðnum Mickelson eftir fimmtán holur. Tvöfaldur skolli og tveir skollar til viðbótar á síðustu þremur þýða að hann er fimm höggum á eftir Mickelson fyrir lokahringinn.

„Dagurinn var frábær líkt og vikan í heild sinni. Ég hlakka bara til morgundagsins," sagði Kim. Þrátt fyrir að Kim hafi fatast flugið á síðustu holunum er hann með fimm högga forskot á hetjuna sína, Tiger Woods.

„Tiger hefur verið í guðatölu hjá mér síðan ég byrjaði að spila og ef ég hafna í betra sæti en hann væri það frábært. En það er ekkert stórmál þótt hann standi sig betur," sagði Kim yfirvegaður.