Messi verður með Barcelona í fyrsta leik

Lionel Messi er leikfær og getur því spilað með Barcelona á morgun þegar liðið hefur leiktíðina á heimaleik á móti Levante. Messi tognaði lítillega í vikunni og gat því ekki spilað með argentínska landsliðinu á móti Ítalíu.

Læknar Barcelona hafa hinsvegar gefið honum grænt ljós og það þrátt fyrir að hann hafi verið að glíma við langvarandi tognanir í læri á síðustu leiktíð. Messi hefur oft komið fljótt til baka eftir meiðsli og svo er einnig nú.

Cesc Fabregas og Pedro Rodriguez eru líka báðir orðnir heilir og geta því einnig spilað þennan leik sem verður fyrsti deildarleikur félagsins undir stjórn Argentínumannsins Gerardo Martino.

Neymar er einnig búinn að jafna sig á veikindum og er í leikmannahópnum í þessum leik. Það er því allt til alls fyrir Börsunga að byrja nýtt tímabil af krafti.