Bayern með nýtt met - 37 leikir í röð án taps

Bayern München setti nýtt met í þýsku úrvalsdeildinni í dag þegar liðið vann 3-0 heimasigur á Augsburg í 12. umferð deildarinnar en auk þess náðu Bæjarar fjögurra stiga forskoti á toppnum því á sama tíma tapaði Dortmund sínum leik.

Bayern München jafnaði 30 ára gamalt met Hamburger SV um síðustu helgi með því að spila sinn 36. leik í röð án þess að tapa en á Bæjarar eiga nú metið einir, 37 leiki í röð í þýsku úrvalsdeildinni án þess að tapa.

Jérôme Boateng kom Bayern í 1-0 á 4. mínútu og Franck Ribéry bætti við öðru marki á 42. mínútu. Thomas Müller innsiglaði síðan sigurinn með marki úr vítaspyrnu á fimmtu mínútu í uppbótartíma.

Marco Reus kom Dortmund í 1-0 á útivelli á móti Wolfsburg en Ricardo Rodríguez og Króatinn Ivica Olić tryggðu Wolfsburg 2-1 sigur. Wolfsburg-liðið er komið upp í 4. sæti eftir sigurinn en Bayer 04 Leverkusen er í 3. sæti eftir 5-3 sigur á Hamburg.

Suður-Kóreumaðurinn Heung-Min Son skoraði þrennu fyrir Leverkusen en hin mörkin skoruðu þeir Stefan Kiessling og Gonzalo Castro.

Úrslitin í þýsku úrvalsdeildinni í dag:

1899 Hoffenheim - Hertha Berlin    2-3

Bayer 04 Leverkusen - Hamburg    5-3

Bayern München - Augsburg    3-0

Schalke 04 - Werder Bremen    3-1

Wolfsburg - Borussia Dortmund    2-1