Pellegrini í tveggja leikja bann

Manuel Pellegrini, stjóri Manchester City, missir af næstu leikjum liðsins í Meistaradeild Evrópu.

Pellegrini var í dag dæmdur í tveggja leikja bann fyrir ummæli sem hann lét falla um sænskan dómara, Jonas Eriksson, að loknu 2-0 tapi liðsins gegn Barcelona í síðustu viku.

Hann missir því af síðari viðureign liðanna í 16-liða úrslitum og einum leik þar að auki. Pellegrini fékk alls þriggja leikja bann en sá þriðji er skilorðsbundinn í tvö ár.

Pellegrini sagði að Eriksson hafi ekki gætt fyllsta hlutleysis í leiknum og þá gagnrýndi hann að dómari frá Svíþjóð hafi verið settur á svo mikilvægan leik. Hann baðst síðar afsökunar á ummællum sínum.