KV fær að spila í 1. deildinni í sumar - spila í Egilshöllinni

Knattspyrnufélag Vesturbæjar fékk í kvöld keppnisleyfi í 1. deild karla í fótbolta í sumar en þátttökuleyfi nýliðanna var ekki staðfest fyrr en á fundi leyfisráðs KSÍ. Þetta kemur fram á heimasíðu KSÍ.

Á seinni fundi leyfisráðs í leyfisferlinu fyrir keppnistímabilið 2014 voru teknar fyrir umsóknir félaganna í efstu tveimur deildum karla um þátttökuleyfi 2014.

„Niðurstaðan var sú að allar umsóknir voru samþykktar og hafa öll 24 félögin því fengið útgefin leyfi fyrir sumarið," segir í frétt á heimasíðu KSÍ sem má finna hér. 

KV hefur spilað heimaleiki sína á Gervigrasvelli KR-inga en hann er ekki löglegur í 1. deildinni. Í samtali við vefsíðuna fótbolti.net staðfesti Páll Kristjánsson, annar af þjálfurum KV-liðsins, að liðið hafi fengið leyfi til þess að spila heimaleiki sína í Egilshöllinni. Það er hægt að sjá viðtalið við hann hér.

Báðir nýliðarnir í 1. deild karla munu því spila innandyra í sumar því HK ætlar að leika heimaleiki sína í Kórnum.