Thorpe mun halda handleggnum

Ástralska sundgoðsögnin Ian Thorpe er á fínum batavegi eftir að hafa fengið slæma sýkingu í öxl. Um tíma var óttast að hann gæti misst handlegg.

"Hann er enn á gjörgæslu enn í góðum anda. Eðlilega líður honum ekki vel en það er ekkert til í því að það þurfi að taka af honum handlegginn," sagði framkvæmdastjóri Thorpe, James Erskine.

Thorpe er fimmfaldur gullverðlaunahafi á Ólympíuleikunum. Hann hefur lent í ýmsum vandræðum síðustu ár.

Hann hefur verið að glíma við þunglyndi og fór í meðferð vegna veikindanna fyrr á árinu. Skömmu síðar fór hann í aðgerð vegna axlarmeiðsla og þá fékk hann sýkingu í öxlina. Það er því skammt stórra högga á milli hjá honum.