Vildi vera í sandölum og var rekinn heim af Masters

Reglurnar eru strangar í kringum Masters-mótið í golfi sem hefst á Augusta-vellinum í dag en það er jafnframt fyrsta risamót ársins.

Matthew Fitzpatrick og kylfusveinn hans, LorneDuncan, fengu að kynnast þessu í gær þegar Duncan var sendur heim og meinuð frekari þátttaka á mótinu þar sem hann vildi ganga um völlinn í sandölum.

Duncan var ekki að reyna vera með vandræði heldur getur hann ekki gengið um í skóm vegna fótsjúkdóms. Það kom aftur á móti ekki til greina af hálfu forráðamanna Masters-mótsins að leyfa honum að bera pokann fyrir Fitzpatrick í sandölum.

„Fagurfræði skiptir greinilega meira máli en manneskjur. Ég sagði mótstjóranum að hann væri ömurlegur. Ég hata þennan stað,“ skrifaði Duncan reiður á Twitter-síðu sína.

Fitzpatrick, sem er enn fremsti áhugamaður heims, fær nýjan mann á pokann en það verður Norður-Írinn Ricky Elliot sem aðstoðar hann um helgina. Elliot er vanalega kylfusveinn Bandaríkjamannsins BrooksKoepka.

„Þetta truflar mig ekkert. Ég er mjög ánægður með að vera hér og hlakka til að vera með reyndan kylfusvein með mér um helgina,“ sagði Matthew Fitzpatrick sem vildi lítið gera úr málinu.