Robben ætlar ekki að horfa á Chelsea og Atletico

Arjen Robben, leikmaður Bayern, á von á svo leiðinlegum leik á milli Chelsea og Atletico Madrid í kvöld að hann ætlar ekki einu sinni að horfa á hann.

Þó svo hann hafi leikið með Chelsea í þrjú ár er honum alveg sama hvaða lið fer í úrslit gegn Real Madrid.

"Síðasti leikur átti ekkert skylt við fótbolta. Það var ekki hægt að horfa á þetta," sagði Robben en hann er eðlilega frekar fúll með að vera úr leik í keppninni sjálfur.

"Ég ber virðingu fyrir stjórum liðanna og það fara allir sína leið. Ég held að Real Madrid muni vinna keppnina og ég óska þeim hins besta."

Robben fór til Real eftir að hafa leikið með Chelsea og þaðan fór hann til Bayern.