Katee Sackhoff í nýjum leik CCP

Leikkonan Katee Sackhoff, sem margir hverjir ættu að kannast við úr þáttunum Battlestar Galactica þar sem hún lék flugmanninn Starbuck, mun leika í aðalhlutverkið í leiknum EVE: Valkyrie. Þar mun hún ljá flugmanninum Rán rödd sína, en leikurinn byggir á sýndarveruleika, sem lætur leikmönnum líða eins og þeir sitji í raun við stjórnvölin á geimskipum.

Þetta var kynnt á EVE: Fanfest í gærkvöldi.

„Þegar ég spilaði EVE: Valkyrie fyrst vissi ég að ég yrði að yrði að taka þátt,“ segir Sackhoff í tilkynningu frá CCP. „Þrátt fyrir þau hlutverk sem ég hef leikið, er þetta það næsta sem ég hef komist því að vera raunverulegur flugmaður geimskips.“

„Katee er fullkominn leikari til leika Rán,“ segir Owen O´Brien hjá CCP. „Hún hefur bæði mikla reynslu af því að gefa sterkum kvenkarakterum líf og ég var mjög ánægður með að sjá að hún var spennt og hafði áhuga á að taka þátt í þessu, eftir að hún spilaði Valkyrie fyrst.“

Kveðju sem Katee sendi gestum á Fanfest hátíðinni má sjá hér að neðan, en leikkonan er mjög frökk í kveðjunni og segist meðal annars ætla að vera á fanfestinu á næsta ári.

Einnig var nýtt verkefni CCP kynnt. Project Legion heitir leikurinn og hann byggir að mörgu leyti á Playstation 3 leik CCP, Dust 514. Nýi leikurinn mun koma út fyrir PC tölvur og verður fjölspilunarskotleikur.

Frekari upplýsingar má sjá á heimasíðu CCP.