Félag stofnað um olíuhöfn Drekans

„Við höfum þegar hafið vinnu við stofnun félags með heimamönnum til að halda utan um starfsemina,“ segir Haukur Óskarsson, stjórnarmaður í Eykon Energy og framkvæmdastjóri iðnaðar hjá Mannviti, í yfirlýsingu vegna þeirrar ákörðunar að velja iðnaðarhöfnina á Reyðarfirði sem þjónustuhöfn Drekasvæðis. Skýrt var frá málinu í fréttum Stöðvar 2 í gærkvöldi. 

Fjarðabyggð og Fljótsdalshérað verða starfssvæði landþjónustu Eykons Energy vegna fyrirhugaðrar olíuleitar og –vinnslu á Drekasvæðinu, samkvæmt ákvörðun stjórnenda fyrirtækisins, að því er fram kemur í fréttatilkynningu Eykons.  Í faglegri úttekt sem gerð var á staðarvali fyrir þjónustumiðstöð kom fram að þessi tvö sveitarfélög stóðu í sameiningu best að vígi bæði hvað aðstöðu varðar og samfélagslega innviði, segir ennfremur í tilkynningunni.

„Svæðið er ákaflega vel staðsett og vel í stakk búið til að takast á við krefjandi þjónustu á borð við þá starfsemi sem felst í olíuleit og vinnslu á fjarlægum hafsvæðum. Við hjá Eykon sjáum fyrir okkur farsælt samstarf við sveitarfélögin tvö næstu árin og lítum björtum augum til framtíðar,” segir Haukur. 

Eykon Energy ehf. á í samstarfi við kínverska orkufyrirtækið CNOOC og norska olíufélagið Petoro og fengu fyrirtækin leyfi til olíuleitar og –vinnslu á Drekasvæðinu 22. janúar síðastliðinn. Jafnframt er Eykon móðurfélag Kolvetna ehf., sem eiga aðild að öðru sérleyfi, ásamt Ithaca og Petoro, sem var úthlutað þann 4. janúar 2013.