Spieth hefur leikið gallalaust golf á TPC Sawgrass

Jordan Spieth hefur vakið mikla athygli fyrir þroskaða frammistöðu sína á Players meistaramótinu en þessi tvítugi strákur er í öðru sæti þegar að mótið er hálfnað á 11 höggum undir pari, einu á eftir Þjóðverjanum Martin Kaymer.

Spieth hefur ekki fengið einn einasta skolla á TPC Sawgrass vellinum hingað til og alls eru 52 holur síðan að hann fékk síðast skolla í móti á PGA-mótaröðinni. Hann skaust fyrst upp á stjörnuhimininn síðasta sumar þegar að hann sigraði á John Deere Classic, aðeins 19 ára gamall. Þá var hann í hörkubaráttu um sigurinn á Masters fyrir stuttu síðan og endaði að lokum í öðru sæti.

„Ég veit að það á eftir að vera erfitt að halda áfram að spila þennan erfiða golfvöll án þess að fá skolla, sérstaklega eftir því sem líður á mótið og pressan eykst,“ sagði Spieth við fréttamenn eftir hringinn í gær. „Þegar að skollarnir koma þá er bara að reyna að koma til baka með fugli og halda einbeitingunni, hringirnir um helgina eiga eftir að verða mjög spennandi.“

Sýnt verður beint frá þriðja hring á Players á Golfstöðinni frá klukkan 17:00 í kvöld.